गुन्ह्यांचे पुरावे गोळा करण्यास येणाऱ्या अडचणी होणार कमी…
गोंदिया ( देवरी ) ; देवरी शहर/तालुका ग्रामीण भागात गंभीर गुन्हे घडल्यानंतर फॉरेन्सिक टीम बोलवावी लागत होती. ही टीम येण्यासाठी खूप वेळ लागत होता. त्यामुळे अनेक गंभीर गुन्ह्यांचे पुरावे गोळा करण्यासाठी अडचणी निर्माण होत होत्या. या सर्वांवर मात करण्यासाठी मुख्यमंत्री तथा गृहमंत्री देवेंद्र फडणवीस यांनी मोबाइल फॉरेन्सिक व्हॅन उपलब्ध करून दिल्या आहेत. देवरी पोलिस उपविभागीय हद्दीसाठी ही मोबाइल फॉरेन्सिक व्हॅन उपलब्ध करून देण्यात आली आहे. नुकतीच ही व्हॅन उपलब्ध झाली असून देवरी शहर पोलीस ठाण्यात या गाडीचा लोकार्पण सोहळा पार पडला.
पोलिस उपअधीक्षक विवेक पाटील, पोलिस निरीक्षक प्रविन डांगे, चिचगड पोलिस्टेसनचे ठानेदार जनार्धन हेगडकर व विशेषता पोलिस हवलदार सुधाकर शहारे यांनी व्हॅनची पूजा केली. सात वर्षे किंवा त्याहून अधिक कारावासाची शिक्षा होणारा गुन्हा घडल्यानंतर संबंधित गुन्ह्याचे घटनास्थळी न्यायवैद्यक पुरावा संकलित करण्यासाठी न्यायवैद्यक तज्ज्ञास नागपुर/नाशिक येथून बोलवावे लागत होते. त्यामुळे वेळेचा अपव्यय होत होता. न्यायवैद्यक पुरावे वेळेत संकलित करण्यास अडचणी निर्माण होत होत्या. भारतीय नागरिक सुरक्षा कायद्याच्या अंमलबजावणीसाठी तसेच भौतिक, रासायनिक, जैविक व डिजिटल पुरावे गोळा करण्यााठी राज्यभरात २५९ मोबाइल फॉरेन्सिक व्हॅन्स प्रकल्पाचे लोकार्पण करण्यात आले होते , ज्याचा फायदा आता देवरी पोलिसांनाही गुन्ह्याचा तपास करतांनी होणार आहे.
पोलिस अधीक्षक गोरख भामरे , अपर पोलिस अधीक्षक अभय डोंगरे यांनी देवरी उपविभागासाठी अत्याधुनिक साधनसामग्रीसह मोबाइल फॉरेन्सिक व्हॅन उपलब्ध करून दिली आहे. या मोबाइल फॉरेन्सिक व्हॅनमध्ये भौतिक, रासायनिक, जैविक व डिजिटल पुरावे गोळा करण्यासाठी कीट्स, रसायने व साधनसामग्री उपलब्ध करून देण्यात आली आहे. व्हॅन उपलब्ध झाल्यामुळे देवरी पोलीस उपविभागा हद्दीत असलेल्या पोलिस ठाण्यामध्ये दाखल होणाऱ्या सात वर्षापेक्षा जास्त शिक्षा होणाऱ्या गुन्ह्यांच्या तपासात विविध प्रकारचे पुरावे गोळा करण्यासाठी याची मदत होणार आहे. या मोबाइल फॉरेन्सिक व्हॅनमधील तज्ज्ञ अधिकारी देवरी शहर पोलिस ठाण्यात उपलब्ध झालेले आहेत.
