• तहसीलदार धनंजय देशमुख, अपर तहसीलदार नवनाथ कातकडे यांची प्रमुख उपस्थिती
• पावसाळा लक्षात घेता सतर्क राहण्याचे यंत्रणेला निर्देश
गोंदिया ( देवरी ) : तालुक्यातील बाघ नदीवर (वैनगंगा नदीची उपनदी) बांधण्यात आलेल्या महत्त्वाच्या ‘मनोहर सागर’ मध्यम सिंचन धरणाला शुक्रवार, दि. ३ जुलै रोजी अतिरिक्त जिल्हाधिकारी मा. अभिजित घोरपडे यांनी भेट दिली. पावसाळ्याच्या पार्श्वभूमीवर त्यांनी धरण परिसराची प्रत्यक्ष पाहणी करून जलसाठा, धरणाची सुरक्षा आणि परिसरातील एकूण परिस्थितीचा सविस्तर आढावा घेतला.
या पाहणी दौऱ्यादरम्यान देवरीचे तहसीलदार श्री. धनंजय देशमुख तसेच अपर तहसीलदार श्री. नवनाथ कातकडे प्रामुख्याने उपस्थित होते.
सुमारे १९० दशलक्ष घनमीटर (MCM) इतकी अवाढव्य पाणी साठवण क्षमता असलेल्या मनोहर सागर धरणावर या भागातील सिंचन आणि पाणीपुरवठा मोठ्या प्रमाणावर अवलंबून आहे. सध्या पावसाळा सुरू झाल्याने धरणातील पाण्याच्या आवकेवर आणि सुरक्षिततेवर प्रशासकिय पातळीवरून बारकाईने लक्ष ठेवले जात आहे. पाहणी दरम्यान उपस्थित वरिष्ठ अधिकाऱ्यांनी धरणाची मुख्य भिंत, सांडवा आणि तांत्रिक यंत्रणेची बारकाईने तपासणी केली.
यंत्रणेला दक्षतेचे आदेश:
अतिरिक्त जिल्हाधिकारी घोरपडे यांनी धरण क्षेत्रातील सद्यस्थिती जाणून घेत संबंधित विभागाच्या अधिकाऱ्यांकडून आवश्यक ती माहिती घेतली. तसेच, पावसाचे प्रमाण वाढल्यास पूर नियंत्रण आणि आपत्ती व्यवस्थापनाच्या दृष्टीने कोणती खबरदारी घ्यावी, याबाबत आवश्यक त्या मार्गदर्शक सूचना उपस्थित यंत्रणेला दिल्या.
या पाहणी दौऱ्यामुळे धरण प्रशासन सतर्क झाले असून, पाणीपातळीवर नियमित देखरेख ठेवली जात असल्याची माहिती प्रशासनाकडून देण्यात आली आहे.
