गडचिरोली (विशेष बातमीदार) : गडचिरोली पोलीस दलाने ६ ऑक्टोबर रोजी महाराष्ट्र-छत्तीसगड सीमेजवळील कोपर्शी जंगल परिसरात विशेष शोध मोहीम राबवून माओवाद्यांनी जमिनीत गाडून ठेवलेला मोठा शस्त्रसाठा आणि स्फोटक साहित्य जप्त केले आहे. या धडक कारवाईत एकूण ६ अग्निशस्त्रांसह मोठ्या प्रमाणावर स्फोटकद्रव्ये हस्तगत करण्यात आली असून, इतर नक्षल साहित्य घटनास्थळीच नष्ट करण्यात आले.
सुरक्षा दलांवर घातपात घडवून आणणे तसेच निवडणूक आणि नक्षल सप्ताहादरम्यान मोठा अनर्थ घडवण्याच्या उद्देशाने माओवाद्यांनी हे साहित्य दुर्गम जंगलात लपवून ठेवले होते.
शोध मोहिमेचा सविस्तर तपशील:
कोपर्शी जंगल परिसरात माओवाद्यांनी स्फोटके व शस्त्रे लपविल्याची गुप्त माहिती मिळताच, गडचिरोलीचे पोलीस अधीक्षक श्री. एम. रमेश यांच्या मार्गदर्शनाखाली विशेष अभियान पथक प्राणहिता (C-60) च्या ५ तुकड्या आणि ‘बीडीडीएस’ (BDDS) च्या २ पथकांना तत्काळ रवाना करण्यात आले. पथकांनी संपूर्ण परिसराला वेढा घालून अत्यंत बारकाईने तपासणी केली असता, जमिनीत पुरुन ठेवलेला हा साठा उघडकीस आला.
जप्त करण्यात आलेल्या साहित्याची यादी
| क्र. | साहित्याचे नाव | प्रमाण / नग |
| १ | .३०३ रायफल | ०१ |
| २ | सिंगल शॉट रायफल | ०२ |
| ३ | गावठी पिस्टल | ०२ |
| ४ | बीजीएल लॉन्चर (BGL Launcher) | ०१ |
| ५ | बीजीएल सेल | १० |
| ६ | जिवंत काडतुसे | २१ |
| ७ | डेटोनेटर | ०७ |
| ८ | केबल वायर | १५० मीटर |
| ९ | मॅगझिन | ०२ |
| १० | कुकर (आयईडी तयार करण्यासाठी) | ०२ |
| ११ | वॉकीटॉकी | ०३ |
| १२ | वॉकीटॉकी चार्जर व बॅटरी | ०५ |
“गडचिरोली जिल्ह्यातील माओवादी चळवळ आता अंतिम टप्प्यात असून जवळजवळ संपुष्टात आली आहे. सुरक्षा दलांच्या सतर्कतेमुळे माओवाद्यांचे घातपाती बेत सतत उधळले जात आहेत.”
— गडचिरोली पोलीस दल
वरिष्ठांचे मार्गदर्शन व कौतुक:
सदर मोहीम पोलीस अधीक्षक श्री. एम. रमेश, अपर पोलीस अधीक्षक (अभियान) श्री. कार्तिक मधीरा, अपर पोलीस अधीक्षक श्री. गोकुल राज जी., अपर पोलीस अधीक्षक अहेरी श्री. हर्षवर्धन बि. जे., आणि पोलीस उप-अधीक्षक (अभियान) श्री. सुनिल उईके यांच्या प्रत्यक्ष देखरेखीखाली राबवण्यात आली. यशस्वी कारवाई करणाऱ्या जवानांचे आणि अधिकाऱ्यांचे पोलीस अधीक्षकांनी विशेष कौतुक केले आहे.
